ຂໍ້ມູນເພີ່ມເຕີມ

Kongor Studios ແລະ Garena ປະກາດການກັບມາຂອງ Heroes of Newerth ໃນຊື່ “Heroes of Newerth: Reborn”

Heroes of Newerth: Reborn ກຽມເປີດຕົວເປັນເກມຫຼິ້ນຟຣີ ພ້ອມເອັນຈິນທີ່ປັບປຸງໃໝ່, ຟີເຈີທີ່ທັນສະໄໝ ແລະ ການລະນຶກເຖິງຕຳນານອັນຍິ່ງໃຫຍ່ຂອງເກມ

Kongor Studios ຮ່ວມກັບ Garena ມີຄວາມຍິນດີເປັນຢ່າງຍິ່ງທີ່ຈະປະກາດຢ່າງເປັນທາງການເຖິງການກັບມາຂອງ Heroes of Newerth ເກມສະໜາມຮົບອອນລາຍແບບຫຼາຍຜູ້ຫຼິ້ນ (MOBA) ທີ່ເປັນທີ່ຮັກຂອງຫຼາຍຄົນ ພາຍໃຕ້ຊື່ໃໝ່: Heroes of Newerth: Reborn ໂດຍມີກຳນົດເປີດຕົວເປັນເກມຫຼິ້ນຟຣີ Heroes of Newerth: Reborn ຈະນຳພາເກມເຂົ້າສູ່ຍຸກໃໝ່ ພ້ອມທັງຮັກສາເອກະລັກດັ້ງເດີມອັນເປັນຕຳນານໄວ້ຢ່າງຄົບຖ້ວນ

Heroes of Newerth ເປີດຕົວຄັ້ງທຳອິດໃນປີ 2010 ແລະ ໄດ້ກາຍເປັນເກມຄລາສສິກທີ່ມີແຟນຄລັບເໜີຍວແໜ້ນໃນວົງການ MOBA ໂດຍໂດດເດັ່ນດ້ວຍຈັງຫວະການຫຼິ້ນທີ່ວ່ອງໄວ ແລະ ກົນລະຍຸດທີ່ເລິກເຊິ່ງ ດຽວນີ້ Heroes of Newerth: Reborn ພ້ອມຕໍ່ຍອດມໍລະດົກນັ້ນດ້ວຍການອັບເກຣດຄັ້ງໃຫຍ່ ແລະ ປະສົບການການຫຼິ້ນທີ່ດີຂຶ້ນ ດ້ວຍຮີໂຣ່ຫຼາຍກວ່າ 80 ຕົວໃນມື້ເປີດຕົວ ແລະ ຈະມີເພີ່ມອີກໃນອະນາຄົດ ເກມນີ້ໄດ້ສ້າງຄວາມສົມດຸນລະຫວ່າງຄວາມຊົງຈຳອັນອົບອຸ່ນ ແລະ ນະວັດຕະກຳທີ່ທັນສະໄໝ ນອກຈາກນີ້ຍັງມີປະສິດທິພາບທີ່ດີຂຶ້ນ, ການຫຼິ້ນທີ່ລື່ນໄຫຼກວ່າເກົ່າ ແລະ ສ່ວນຕິດຕໍ່ຜູ້ໃຊ້ທີ່ອອກແບບໃໝ່ທັງໝົດ

Kongor Studios ເຮັດໃຫ້ວິໄສທັດກາຍເປັນຈິງ

“ຫຼັງຈາກຫຼາຍປີທີ່ໄດ້ຮັບການສະໜັບສະໜູນຈາກຊຸມຊົນ ແລະ ຄວາມທຸ່ມເທຂອງແຟນເກມທີ່ມີໃຈຮັກ ພວກເຮົາຕື່ນເຕັ້ນທີ່ສຸດທີ່ຈະນຳ Heroes of Newerth ກັບມາມີຊີວິດອີກຄັ້ງ” Jesse Hayes ຜູ້ຮ່ວມກໍ່ຕັ້ງ Kongor Studios ແລະ ອະດີດນັກພັດທະນາຂອງ S2 Games ກ່າວ “ນີ້ບໍ່ແມ່ນພຽງການເປີດຕົວໃໝ່ ແຕ່ເປັນການຈິນຕະນາການໃໝ່ວ່າເກມນີ້ຈະເປັນແນວໃດໄດ້ແດ່ໃນໂລກເກມແຂ່ງຂັນຍຸກປັດຈຸບັນ ຕັ້ງແຕ່ພາບກຣາຟິກຈົນເຖິງປະສິດທິພາບເຄືອຂ່າຍ ພວກເຮົາໄດ້ທຸ່ມເທຢ່າງໜັກເພື່ອມອບປະສົບການທີ່ດີທີ່ສຸດໃຫ້ທັງຜູ້ຫຼິ້ນເກົ່າ ແລະ ຜູ້ຫຼິ້ນໃໝ່”

Nick Caras ຫຼື ທີ່ຮູ້ຈັກກັນໃນນາມ BreakyCPK ຜູ້ອຳນວຍການຝ່າຍສື່ສານຂອງ Kongor Studios ກ່າວເພີ່ມວ່າ: “Heroes of Newerth ມີບ່ອນພິເສດໃນໃຈຂອງຜູ້ຫຼິ້ນສະເໝີມາ ແລະ ດ້ວຍ HoN: Reborn ພວກເຮົາຍັງຄົງຮັກສາສິ່ງທີ່ເຮັດໃຫ້ເກມນີ້ມີເອກະລັກໄວ້ ພ້ອມທັງອັບເກຣດທຸກຢ່າງອ້ອມຂ້າງມັນ ການເປັນພັນທະມິດກັບ Garena ມີຄວາມສຳຄັນຢ່າງຍິ່ງໃນການເຮັດໃຫ້ສິ່ງນີ້ກາຍເປັນຈິງ ແລະ ພວກເຮົາແທບລໍຖ້າບໍ່ໄຫວທີ່ຈະໄດ້ເຫັນຜູ້ຫຼິ້ນກັບເຂົ້າສູ່ Newerth ອີກຄັ້ງ”

ຄວາມມຸ່ງໝັ້ນຢ່າງຕໍ່ເນື່ອງຂອງ Garena ຕໍ່ແຟຣນໄຊນີ້

“Garena ເຊື່ອໝັ້ນມາສະເໝີໃນທ່າແຮງຂອງ Heroes of Newerth ໃນຖານະເກມທີ່ເຂົ້າເຖິງໃຈຜູ້ຫຼິ້ນຢ່າງເລິກເຊິ່ງ” ຕົວແທນຈາກ Garena ກ່າວ “ພວກເຮົາຕື່ນເຕັ້ນທີ່ໄດ້ຮ່ວມມືກັບ Kongor Studios ເພື່ອເຕີມລົມຫາຍໃຈໃໝ່ໃຫ້ກັບແຟຣນໄຊນີ້ ການຮ່ວມມືຄັ້ງນີ້ຈະຮັບປະກັນວ່າຈິດວິນຍານຂອງເກມຕົ້ນສະບັບຍັງຄົງຢູ່ ພ້ອມທັງເຂົ້າເຖິງກຸ່ມຜູ້ຫຼິ້ນທີ່ກວ້າງຂຶ້ນຜ່ານການປັບປຸງທີ່ທັນສະໄໝ” – Jason Ng, ຮອງປະທານຝ່າຍພັນທະມິດຍຸດທະສາດ, Garena

ຟີເຈີໃໝ່ ແລະ ລາຍລະອຽດການເປີດຕົວ

Heroes of Newerth: Reborn ຈະມາພ້ອມກັບ:

• ປົດປ່ອຍພະລັງຂອງຮີໂຣ່ກວ່າ 80 ຕົວ: ລຸຍສະໜາມຮົບກັບຮີໂຣ່ທີ່ຄັດສັນມາກວ່າ 80 ຕົວໃນມື້ເປີດຕົວ ແຕ່ລະຕົວພ້ອມຄອງສະໜາມ ແລະ ຈະມີຮີໂຣ່ເພີ່ມຂຶ້ນເລື້ອຍໆຫຼັງເປີດຕົວ!
• ສຳຜັດການຫຼິ້ນທີ່ໄວປານສາຍຟ້າ: ຂັບເຄື່ອນດ້ວຍເອັນຈິນທີ່ລ້ຳສະໄໝ ເພີດເພີນກັບປະສິດທິພາບທີ່ລື່ນໄຫຼສຸດໆ ດ້ວຍ FPS ທີ່ສູງຂຶ້ນ ແລະ ເຊີບເວີ 100-tick ທີ່ຕອບສະໜອງໄວເປັນພິເສດ
• ສຽງ ແລະ ພາບທີ່ປັບປຸງໃໝ່: ດຳດິ່ງສູ່ໂລກທີ່ຖືກຣີມາສເຕີໃໝ່ທັງໝົດ ພ້ອມສຽງທີ່ດີຂຶ້ນ, ເອັບເຟັກທີ່ອັບເດດ ແລະ UI ທີ່ທັນສະໄໝ ໂດຍຍັງຄົງເປັນເກມທີ່ທ່ານຮັກ
• ປະເຊີນໜ້າກັບ Phoenix ຜູ້ຍິ່ງໃຫຍ່: ທ້າທາຍຕົວເອງກັບບອສຕົວໃໝ່ Phoenix ເປົ້າໝາຍທີ່ຍາກ ແຕ່ຄຸ້ມຄ່າກັບລາງວັນ
• ເປັນຊ່ຽວຊານກົນໄກໃໝ່: ຄົ້ນພົບການຫຼິ້ນແບບໃໝ່ ດ້ວຍ Ravens ທີ່ຊ່ວຍເປີດວິໄສທັດ, ໃຫ້ Kongor ດັນເລນ ແລະ ອື່ນໆອີກຫຼາຍ
• ເຍາະເຍີ້ຍຢ່າງມີສະໄຕລ໌: ຄອງເກມຈິດວິທະຍາ! ໃຊ້ອີໂມດເຍາະເຍີ້ຍຄູ່ແຂ່ງ ແລະ ເຮັດໃຫ້ພວກເຂົາຫົວຮ້ອນ ຂະນະທີ່ທ່ານຍາດໄຊຊະນະ
• ຄິວຕາມຕຳແໜ່ງ: ຕອນນີ້ທ່ານສາມາດເລືອກຕຳແໜ່ງທີ່ຕ້ອງການຫຼິ້ນໄດ້ ເມື່ອເຂົ້າຄິວຫາແມັດ

ສຳລັບຂໍ້ມູນເພີ່ມເຕີມກ່ຽວກັບການເປີດຕົວ Heroes of Newerth: Reborn ເຂົ້າເບິ່ງເວັບໄຊທາງການທີ່ www.heroesofnewerth.com ແລະ ຕິດຕາມຂ່າວສານຜ່ານໂຊຊຽວມີເດຍທາງ Facebook ແລະ X

ກ່ຽວກັບ Garena

Garena ເປັນຜູ້ພັດທະນາ ແລະ ຜູ້ໃຫ້ບໍລິການເກມອອນລາຍຊັ້ນນຳລະດັບໂລກ Free Fire ເກມມືຖືແນວເອົາຕົວລອດ (Battle Royale) ທີ່ Garena ພັດທະນາເອງ ເປັນເກມມືຖືທີ່ມີຍອດດາວໂຫຼດສູງສຸດໃນໂລກຕັ້ງແຕ່ປີ 2019 ຫາ 2021 ແລະ ເປັນເກມມືຖືແນວເອົາຕົວລອດທີ່ມີຍອດດາວໂຫຼດສູງສຸດໃນປີ 2022 ແລະ 2023 ອີງຕາມຂໍ້ມູນຈາກ data.ai

Garena ດຳເນີນງານໂດຍຄົນທີ່ຮັກການຫຼິ້ນເກມ ຈຶ່ງເຂົ້າໃຈຢ່າງເລິກເຊິ່ງວ່າເກມເມີຕ້ອງການຫຍັງ Garena ໄດ້ຮັບລິຂະສິດແບບສະເພາະ ແລະ ເປັນຜູ້ໃຫ້ບໍລິການເກມດັງຈາກພັນທະມິດທົ່ວໂລກ ເຊັ່ນ Arena of Valor ແລະ Call of Duty: Mobile ໃນຕະຫຼາດທີ່ຄັດເລືອກທົ່ວໂລກ Garena ສົ່ງເສີມປະສົບການດ້ານສັງຄົມ ແລະ ຄວາມບັນເທີງຜ່ານເກມ ເຮັດໃຫ້ຊຸມຊົນສາມາດມີສ່ວນຮ່ວມ ແລະ ພົວພັນກັນ ນອກຈາກນີ້ Garena ຍັງເປັນຜູ້ຈັດງານອີສປອດຊັ້ນນຳ ແລະ ເປັນເຈົ້າພາບງານອີສປອດທີ່ໃຫຍ່ທີ່ສຸດບາງງານໃນໂລກ

Garena ເປັນສ່ວນໜຶ່ງຂອງ Sea Limited (NYSE:SE) ບໍລິສັດອິນເຕີເນັດເພື່ອຜູ້ບໍລິໂພກຊັ້ນນຳລະດັບໂລກ ນອກຈາກ Garena ແລ້ວ ທຸລະກິດຫຼັກອື່ນໆຂອງ Sea ລວມມີ Shopee ທຸລະກິດອີຄອມເມີສ ແລະ SeaMoney ທຸລະກິດບໍລິການການເງິນດິຈິຕອນ ພາລະກິດຂອງ Sea ຄືການໃຊ້ເທັກໂນໂລຢີເພື່ອຍົກລະດັບຊີວິດຂອງຜູ້ບໍລິໂພກ ແລະ ທຸລະກິດຂະໜາດນ້ອຍ